INTRODUCTION:
Ang salitang “immutable” ay nagmula sa salitang Latin na immutabilis *in* o *im* = hindi + *mutabilis* = maaaring magbago. Ang ibang mga salitang tulad ng “hindi nagbabago,” “palagian,” at “tapat” ay nakatutulong upang maunawaan ang banal na katangiang ito. Ang immutability ng Diyos ay nangangahulugan na hindi Siya kailanman nagbabago sa Kanyang mga katangian o sa Kanyang mga layunin. Ang Diyos ay hindi lumalago, nag-e-evolve, o nagpapabuti pa, sapagkat siya ay perpekto na. Hindi Siya maaaring mabawasan, masira, o umatras, sapagkat kung mangyayari iyon, hindi na Siya magiging Diyos. Kung ano ang Diyos, iyon na Siya noon pa man at iyon din Siya magpakailanman. Hindi Siya nagbabago ng Kanyang isip o nagpapawalang-bisa ng isang kautusan sa pamamagitan ng panibagong kautusan. Hindi Siya gumagawa ng pangako at pagkatapos ay binabago ang Kanyang panata. Hindi Siya nagbabanta at pagkatapos ay hindi tutuparin iyon. Ito ay lubhang nagbibigay-kaaliwan, sapagkat ang posibilidad na ang isang Makapangyarihang Diyos ay biglang maging masama o biglang magbago ng isip ay tunay na nakakatakot. Ang immutability ng Diyos ay isa sa Kanyang pinakamahalagang katangian sapagkat tinitiyak nito na Siya at ang Kanyang Salita ay mananatiling pareho kahapon, ngayon, at magpakailanman (Hebreo 13:8). Siya ang tanging hindi nagbabago sa buong sansinukob—ang tanging karapat-dapat sa ganap na pagtitiwala.
I. ANG PANGALAN NG DIYOS ANG ISANG PATUNAY NG KANYANG PAGIGING IMMUTABLE
Sa Kasulatan, ang pangalan ng isang tao ay may malaking kahalagahan sapagkat madalas nitong inilalarawan kung sino siya at may inihahayag tungkol sa kanyang pagkatao. Ano ang mga pangalang ibinigay sa Diyos sa mga sumusunod na talata ng Kasulatan, at ano ang itinuturo ng mga ito tungkol sa Kanyang hindi nagbabagong kalikasan (immutability)?
a. “AKO AY KUNG SINO AKO” (Exodo 3:14). Ang pangalang ito ay nagmula sa pandiwang Hebreo na hayah, na nangangahulugang “maging” o “umiral.” Itinuturo nito hindi lamang ang walang hanggang kalikasan ng Diyos at ang Kanyang pag-iral sa sarili (self-existence), kundi pati ang Kanyang hindi nagbabagong kalikasan. Siya ay laging umiiral, at Siya ay laging nananatiling pareho.
b. “Ang Bato” (Deuteronomio 32:4). Ang pangalang ito ay halos hindi na nangangailangan ng paliwanag. Sa loob ng nilikha, kakaunti ang mga bagay na mas permanente o hindi nagbabago kaysa sa bato at sa mga bundok na nabubuo mula rito. Nakaaaliw malaman na kahit ang paghahambing na ito ay hindi pa rin sapat upang ilarawan ang Diyos. Kapag ang lahat ng bato sa mundong ito ay naging alabok na, ang Diyos ay mananatiling hindi nagbabago.
II. ANG ILANG TALATA NA NAGPAPATOTOO NG KANYANG PAGIGING IMMUTABLE
Matapos nating pag-aralan ang mga pangalan ng Diyos na nagpapahayag ng Kanyang hindi nagbabagong kalikasan, titingnan naman natin ngayon ang ilan sa pinakamahalagang pahayag sa Biblia tungkol sa katangiang ito. Ano ang itinuturo ng mga ito sa atin tungkol sa hindi nagbabagong kalikasan ng Diyos at sa Kanyang kaugnayan sa Kanyang nilikha? Paano nito ipinapakita ang Kanyang kadakilaan?
a. Awit 102:25–27.
Ang mga nilikha ng Diyos ay mawawala, mapapalitan at masisira, ngunit ang Diyos ay mananatili. Siya ay likas na hindi nagbabago at nasisira.
b. Malakias 3:6
MGA TALA: Ito ay isang makapangyarihang pagpapakita kung paano naaapektuhan ng hindi nagbabagong kalikasan ng Diyos (immutability) ang Kanyang relasyon sa Kanyang bayan. Kahit sa gitna ng kawalang-katapatan ng Israel sa Diyos, Siya ay nanatiling tapat, sapagkat Siya ay hindi nagbabago at ang Kanyang mga pangako ay hindi nabibigo.
c. Santiago 1:17
MGA TALA: Ganito ang pagbasa sa New English Translation: “Ang bawat mabuting kaloob at bawat ganap na regalo ay mula sa itaas, na nagmumula sa Ama ng mga ilaw, na sa Kanya ay walang pagbabago o kahit kaunting bakas man ng pag-iiba.”
d. Hebreo 13:8
Si Jesucristo ay siya ring kahapon, ngayon, at magpakailanman. Bilang isang Diyos, Ang pangalawang Persona sa Banal na Trinidad, siya din ay hindi nagbabago.
MGA TALA: Ang ating kaligtasan ay panatag sapagkat ang ating Dakilang Diyos at Tagapagligtas na si Jesucristo (Tito 2:13) ay hindi nagbabago. Ang Kanyang ganap na karakter, ang pagtubos na Kanyang ibinigay, at ang lahat ng Kanyang mga pangako ay pareho kahapon, ngayon, at magpakailanman.
III. ANG PUSO, ISIPAN, AT KAGUSTUHAN NG DIYOS AY HINDI NAGBABAGO.
3. Matapos nating pag-aralan ang maraming talata ng Kasulatan na nagsasalita tungkol sa hindi nagbabagong kalikasan ng Diyos, titingnan naman natin ang mga talata na partikular na nagsasalita tungkol sa hindi nagbabagong kalikasan ng Kanyang Salita at Kanyang kalooban (counsel). Ano ang itinuturo ng mga sumusunod na talata tungkol sa kanilang hindi nagbabagong kalikasan? Ano rin ang itinuturo nito tungkol sa relasyon ng Diyos sa Kanyang nilikha—lalo na sa tao?
a. I Samuel 15:29
MGA TALA: Ipinapahayag ng talatang ito na ang Diyos ay “hindi tao upang Siya ay magsisi o magbago ng isip.” Mula sa talatang ito at sa iba pa, malinaw na ang hindi nagbabagong kalikasan ng Diyos ay umaabot maging sa Kanyang mga pasiya at kalooban. Siya ay ganap sa karunungan kaya hindi Siya nagkakamali sa Kanyang mga ipinapasiya; Siya ay makapangyarihan sa lahat, kaya nagagawa Niya ang lahat ng Kanyang napagpasiyahan. Ngunit paano natin ipagkakasundo ang turong ito sa ibang mga talata na tila nagtuturo ng kabaligtaran? Sa Genesis 6:6, sinasabing ang Diyos ay “nagsisi na nilikha Niya ang tao.” Sa Exodo 32:9–14, ang Panginoon ay “nagbago ng pasiya” tungkol sa paglipol sa suwail na bansang Israel. At sa Jonas 3:10, ang Diyos ay “nagbago ng isip” tungkol sa kapahamakan na Kanyang sinabi na darating sa lungsod ng Ninive. Nagkakasalungatan ba ang Kasulatan? Talaga bang nagbabago ang isip ng Diyos? Ang sagot ay hindi kasing kumplikado o misteryoso gaya ng maaaring isipin. Malinaw na itinuturo ng Kasulatan na ang mga katangian, layunin, at mga pangako ng Diyos ay laging pareho. Ngunit hindi nito ibig sabihin na ang Kanyang pakikipag-ugnayan at pakikitungo sa Kanyang pabago-bagong nilikha ay hindi maaaring mag-iba. Ang Genesis 6:6 ay tumutukoy lamang sa banal na pagtugon ng Diyos sa kasalanan ng tao at sa Kanyang pasiya na lipulin ang tao mula sa ibabaw ng lupa (tingnan ang talata 7; gayundin sa I Samuel 15:11, 26). Sa Exodo 32:9–14, ang Diyos ay “nagbago ng pasiya” tungkol sa paglipol sa Israel bilang mahabaging tugon sa panalangin ni Moises—isang panalangin na ang Diyos mismo ang gumabay at nagbigay-lakas kay Moises upang ipanalangin. Sa Jonas 3:4–10, ang Diyos ay “nagbago ng pasiya” sa pagwasak sa Ninive nang ang Ninive ay magsisi at tumalikod sa kanilang kasalanan. Ang mga talatang ito ay nagpapaalala sa atin na ang hindi nagbabagong kalikasan ng Diyos ay hindi nangangahulugang Siya ay hindi kumikilos. Hindi Siya nagbabago, ngunit hindi rin Siya hindi gumagalaw, walang pakialam, o walang pakikibahagi sa Kanyang nilikha. Siya ay buhay at kumikilos, at Siya ay nakikipag-ugnayan sa Kanyang nilikha. Siya ay laging pareho, ngunit ang Kanyang ugnayan at pakikitungo sa mga taong nagbabago-bago ay maaaring mag-iba ayon sa kanilang pagtugon sa Kanya (Jeremias 18:7–10; Ezekiel 18:21–24). Hindi ito pagsalungat sa Kanyang hindi nagbabagong kalikasan, kundi patunay nito. Laging tutugon ang Diyos sa mga gawa ng tao ayon sa Kanyang hindi nagbabagong mga katangian.
b. Bilang 23:19
Sa bersikolong ito, malinaw na sinasabi na ang Diyos ay hindi nagsisinungaling, at hindi kailanman magsisisi. Ito ay nangangahulugan na ang Diyos natin ay may isang Salita, at ang kanyang mga Salita ay hindi kailanman magbabago, at ito ay kanyang tutuparin.
IV. ANG PANANATILI NG KANYANG PLANO, PAGPAHAYAG, AT KAHARIAN AY NAGPATOTOO DIN NG KANYANG PAGIGING IMMUTABLE
4. Mahalagang maunawaan na ang hindi nagbabagong kalikasan ng Diyos (immutability) ay nakasalalay hindi lamang sa Kanyang kasakdalan, kundi pati sa Kanyang kapangyarihan. Ang Diyos ay hindi magiging hindi nagbabago kung mayroong isang nilalang o kapangyarihan na higit sa Kanya na maaaring pumilit o magmanipula sa Kanya. Ano ang itinuturo ng mga sumusunod na talata tungkol sa kataas-taasang kapangyarihan (sovereignty) at kapangyarihan ng Diyos? Mayroon bang anumang nilalang o bagay na makapagbabago sa Diyos?
a. Isaias 14:24
Kung ang Diyos ay may balak o plano, ito ay mangyayari, gagawin niya ito at hindi kailanman magbabago. Kung merun siyang panukala, ito ay kanyang tutuparin, at ito ay mangyayari, ito ay hindi kailanman mababago ng kahit ninoman.
b. Isaias 46:9–10
Noong una pa lang bago pa likhain ang mundo, ipinahayag na ng Diyos ang lahat ng mangyayari mula sa simula hanggang sa wakas. At dahil nga ito ay naihayag na, hindi na ito kailanaman mababago.
c. Daniel 4:34-35
Ang kanyang kaharian ay mananatili kailanman,ibig sabihin, ito ay hindi kailanman mawawasak. Ito ay nagpapatunay na ang kanyang pagiging immutable.
Reflection:
Dahil wala tayong application, anu ang epekto ng pagiging immutable ng Diyos sa atin?